明报：张慧仪爆当年因《强姦3》与TVB闹翻离巢︰我都几无辜
张慧仪近日接受锺慧冰网上频道节目访问，分享从马来西亚参加选美后来香港发展的往事。她表示初来港时因广东话麻麻，最初获TVB安排在公司做接线生及读报纸练广东话。张慧仪坦言年轻时的她性格较直和任性，加上外形惹火，衣著较性感，不少TVB同事最初也不喜欢她，用一些不好的字眼形容她，她听到后就对抗起来，令别人更不喜欢她。
谈到当年因演出处境剧《真情》“彩瑶”一角而入屋，彩瑶后来却被编剧“赐死”，张慧仪透露︰“我估我嗰时离开《真情》就係因为我啲性格唔讨好，应该係咁。（所以就安排你死？）应该係咁﹗嗰时我好天真，我仲未意识到，亦有少少觉得唔紧要啦，係后来啲人讲返畀我听，但係真係假，我哋冇考究。我都冇乜嘢，你唔知，就冇摆喺心度。我都冇谂到有咁大迴响，离开咗《真情》后，开始街上啲人‘彩瑶彩瑶’咁叫我，嗰阵时开始发觉自己被人认识。后来，听讲好似係因为马来西亚好多观众写信去TVB，唔知真定假，讲希望呢个角色呢个人可以再出现，所以后来就有阿贵。”
张慧仪因为《真情》“阿贵”的性感形象而被王晶留意到，后来获邀请拍戏，没料到亦因此成为她日后离开TVB的导火线。张慧仪说︰“其实当时我係TVB包薪艺员，我所接嘅所有工作都必须TVB艺员部批准。开始时係接王晶《追女仔》嘅戏，都係性感啲，去到后期，我人生中第一部电影女主角，亦都係我最大胆嘅一部电影，我冇露点，但係我好大胆，嗰部戏就係《强姦3》。呢部係王晶同TVB倾嘅，艺员部同意，因为我冇权话事，係公司艺员部同意嘅。咁好啦，我就去拍，但係我当时仲拍紧《真情》阿贵，同阿海去到后期，阿贵已经由开始时好火辣，已经喺戏入面从良，变好咗啦。我接咗《强姦3》呢部戏，当时TVB制作部嗰边就好大嘅迴响，觉得我点解。其实我都几无辜，係TVB你哋同意我去做，做完返嚟畀人闹嗰个又係我，话你《真情》入屋嘅，你又喺嗰边咁。”
张慧仪觉得演员应该要可塑性高，让观众看见其不同面向。她续说︰“我作为一个演员，其实有乜所谓。或者立场唔同，TVB嘅剧入屋，我觉得演员应该要可塑性高，嗰阵时我喺度谂，喺电影我係性感，但我喺电视係入屋，畀观众睇到两面嘅我，咁样係一件好事。呢个係我自己谂法，或者同公司立场唔同，所以后来就分道扬镳。（因为咁样离开TVB？ ）係，大家意见不合，我又唔听教﹗记得有一次我返公司，一入去就畀人闹，话我‘你呀，你要慢慢教﹗’嗰段时间係我最忙嘅时候，瞓都冇得瞓，记得我当日朝早喺船上拍完《强姦3》，9点就要入厂拍摄。我基本上係好准时嘅人，唔会迟到，嗰日我喺船上拍完返到屋企要冲凉后快快入厂，我一除完件衫就喺个客厅度瞓着咗。咁样嘅状态之下返到去，写字楼啲人闹我，话我又性感又乜嘢，话‘你要慢慢教’。嗰一下我即刻着火，‘我嚟呢度係做嘢，我唔係嚟接受家庭教育’，嗰啲人就话‘你好大胆，你要慢慢教’。乜嘢叫做慢慢教？大家可以讲，同埋我好无辜，係你哋批准我先至做，係咪你哋自己冇沟通呢？我就咁讲，跟住佢哋就话‘畀你红咗仲得掂嘅’。咁好啦，所以大家就分道扬镳。”
