【On.cc】關智斌被讚似「小飛俠」唔識老 自爆凍齡秘方：晚晚打針
藝人關智斌（Kenny)日前上TVB娛樂新聞台節目《StarTalk》，接受許文軒（Edmond）訪問，大談相隔4年多再推出廣東歌時，直言對歌迷感到抱歉：「記得4年幾前出完《隱形人》之後，去咗內地拍攝節目，當時因為疫情，唔係隨時可以返香港，冇理由出咗首歌又唔去做宣傳。」Kenny又指：「呢幾年心態變咗，以前淨係識唱歌，唱完就算。呢幾年因為做咗內地節目亦做巡迴演唱會，發覺自己好想做一個表演舞台，喺演唱會上結合跳舞、唱歌、演戲等舞台元素，於是就開始萌生咗一個『小飛俠』嘅音樂企劃。直到上年年尾決定做一份計劃書，整埋成份PowerPoint畀公司高層睇，畀佢哋清楚知道我心目中想創作嘅故事，希望做一系列有關『小飛俠』嘅歌曲同舞台，成件事真係好有誠意，最後出咗《永遠的彼得潘》，成個企劃由呢一首歌開始。」
Kenny表示好多人都覺得他像小飛俠，主要因為大家都覺得他唔識老，他笑言：「 睇吓同邊個比？如果同自己同學嘅話就係，如果同我同公司嘅歌手好似容祖兒、蔡卓妍、謝霆鋒比嘅話，佢哋全部出道到依家都冇變。」Kenny分享凍齡心得，戲言晩晚打針，之後正經表示，覺得心態好重要：「我覺得自己有小飛俠樂觀面對世界嘅態度，好似我喺谷底嘅時候，都冇日日意志消沉，怨天怨地，自己一定會搵嘢去做。我鍾意做乜就去做乜，唔理其他人點睇，好似呢個年紀走去學滑雪同攀石，出面啲人都笑我，小心整親，手腳唔再係有20歲嗰時嘅耐力，我覺得咁樣身心先至會保持到。」
《永遠的彼得潘》由林若寧填詞，Kenny都會研究歌詞，有意見便提出：「覺得呢首歌有句歌詞好似冇貼近依家嘅小朋友，所以就改咗唔同嘅字眼。點知去到錄音嘅時候，自己唱唱下又覺得林若寧嘅解釋，原來又好啱數，於是自己就唱番最初嘅版本，可能佢心諗一早咪話咗你囉！」
關智斌親解新歌構思。
他被讚似小飛俠唔識老。
大方分享凍齡心得。
心態最重要！
