陳庭欣桃花未旺事業先得益 同阿Bob介紹筍盤「了解中」.陳庭欣今日出席博爱欢乐传万家记者会，受訪时首度正面回應坊間熱傳的「拜狐仙求姻緣」傳聞，澄清事件原來純屬烏龍，同時大方分享感情近況，更針對近期全城熱議的匹克球擾民問題發表看法，直言兩邊的合理需求都需要被正視。
講到近日引來熱議的拜狐仙事件，陳庭欣直言整件事由頭到尾都係一場誤會，純粹是為了配合公司安排的專訪行程：「過年前公司話想同我同Bob爺一齊做個專訪，話行程係去拜神。我本身完全冇任何宗教信仰，連風水都唔睇，平時最多只會簡單去攝太歲，當時諗住為咗做專訪就去啦，去到先知原來係拜狐仙。」
她坦言雖然自己無相關信仰，但全程都保持尊重，做足所有儀式細節：「無論係中方、西方定民間嘅信仰，我覺得都應該尊重。Bob都知道我冇信仰，佢話信唔信都好，試下都無妨，得嘅話就幫到手，唔得都冇所謂。」被問到現場會唔會感到害怕，她就笑言自己完全無懼：「我本身唔信呢啲，根本唔覺得佢存在，就算睇鬼片、聽鬼故我都唔會驚，只係當長見識，知道民間有呢樣習俗。」
至於拜完之後有無「靈驗」，陳庭欣就笑言姻緣未見大進展，反而事業桃花率先開花：「其實桃花運唔止係姻緣，仲有事業方面。拜完之後最近工作量真係多咗，無論係私人公司嘅工作，定慈善團體嘅合作都增加了，Bob仲即刻發訊息問我『係咪得咗啊』，真係好好笑。」
講到被封「娛樂圈金牌媒人」的林盛斌（Bob）全程緊張自己的終身大事，陳庭欣就笑言Bob簡直變成了自己「老竇」，比屋企人還要上心。「過年前佢已經成日同我溝通呢件事呢兩日仲傾得更密，佢真係介紹咗唔同朋友俾我認識，其中一個仲一齊參加過佢公司嘅午餐活動，正式見過面。」
她大方承認，同呢位由Bob介紹的男士目前正處於「了解中」，雙方對彼此的印象都不錯，更有共同話題：「我本身比較多話講，好少會同傾唔埋，呢位男士最近係度搞匹克球場地，雖然佢自己唔打，但我哋就多咗呢個共同話題。」她就笑言Bob實在太心急，全程緊追進度：「Bob成日追住問『傾唔傾得埋啊？對方對你印象點啊？』，仲將我哋嘅對話、相都發俾對方睇，搞到我有啲尷尬，不過好彩雙方印象都係正面的。」
陳庭欣坦言，自己對於感情事一點都不急，現階段更享受專注工作的狀態：「其實我真係唔急，咁多年過去，我需要多啲時間沉澱自己，而家好享受全神貫注返去工作上面。」但她都笑言，對Bob的「媒人服務」充滿期待：「雖然我唔急，但都將寄望放咗係Bob度。佢而家仲被其他女藝人投訴，好似Adrienne劉神芝都公開叫佢唔好只顧住我陳庭欣，要幫埋其他人介紹，今年Bob真係會好忙，Bob加油！」
針對近期《東張西望》報道、全城熱議的匹克球噪音擾民問題，本身熱愛呢項運動的陳庭欣，亦都深入分享了自己的看法。她首先澄清自己並非推廣匹克球，只係個人愛好，同時完全明白受滋擾居民的感受：「我雖然鍾意打呢項運動，但我完全明白居民嘅困擾，如果我住係球場附近，我都好可能會覺得受影響。」
她直言，匹克球的聲響的確不小，正是擾民的核心原因：「老實講，匹克球嘅聲音真係好大，我睇過相關調查，話佢嘅聲量比網球大6、7倍。我完全明白，如果長時間聽住呢個音量，無論係屋企做緊事定係休息，都一定會覺得困擾。」
至於如何平衡運動愛好者與居民的需求，陳庭欣認為，關鍵在於政府帶頭解決場地不足的深層矛盾：「呢項係新興運動，大家都係正常日頭時段打，唔會凌晨三四點去玩，點樣喺兩者之間取得平衡，我覺得真係要靠政府同區議員出手。香港最大嘅問題，無論係匹克球、羽毛球、網球定高爾夫球，好多運動都係嚴重唔夠場地。所以我覺得一定要政府帶頭，正視呢個問題，既要顧及鍾意打運動嘅朋友，亦都要照顧到受滋擾居民的需求，幫兩邊搵到一個平衡。」
她坦言，自己作為普通玩家，根本控制不到場地的選址同隔音措施，只希望事件可以盡快得到圓滿解決：「我淨係鍾意打，根本控制唔到場地嘅問題，所以好希望呢件事可以快啲解決，令兩邊都可以得到自己想要的結果。好多謝市民報料俾《東張西望》，令呢件事得到大眾同相關部門的關注。」
最後她亦都補充，同Bob介紹、從事匹克球場地運營的男士，她已經第一時間同對方傾過呢個擾民問題：「我第一件事就同佢提咗呢件事，問佢個場會唔會好接近民居，始終而家呢件事全城關注。不過以我所知，佢個場唔近民居，照道理應該唔會有呢方面嘅影響。」TVB
