【On.cc】陳瀅蔡潔搞《Pillow Talk》 台上唱歌有壓力
兩位女神陳瀅和蔡潔早前宣布攪攪新意思，將於4月25日在澳門演出《Pillow Talk》，今日首度公開官方海報，海報上2人臉帶微笑拿着枕頭，營造出閨蜜之間心有靈犀的畫面。
為準備演出，陳瀅和蔡潔將時間表重新調整，除必要工作外，其餘大部分時間也預留練歌和練氣，期望在台上把最好的表演帶給大家。問到會否感到壓力，陳瀅表示當然有，始終第一次在台上唱歌，「不過朋友知道我開show都覺得呢件事好新奇，我會努力做好呢個演出，唔會令每一個入場嘅觀眾失望。至於我會唔會轉跑道去唱歌，暫時應該唔會，我始終都係比較鍾意做演員多啲，不過依家有個咁好嘅機會畀我，我唔介意去嘗試。」蔡潔同樣表示緊張：「因為我哋兩個真係冇喺舞台上面做Show嘅經驗，我希望可以發揮好我揀嘅歌，可以講到一啲故事畀入嚟支持我哋嘅觀眾聽，呢啲故事係關於由我出道到依家嘅一啲想法同改變，所以我希望做好呢一Part，大家睇完之後又有共鳴，我就好開心㗎！」
至於歌單方面她們就大賣關子，陳瀅表示希望讓來睇騷的觀眾場有驚喜，蔡潔表示會在社交平台開放點歌，「大家如果想聽我唱咩歌都可以留言，我會盡力去揀一啲大家想聽嘅歌去唱，但我都已經揀咗部分歌出嚟，到時見到班fans唱畀佢哋聽，又可以玩吓遊戲傾吓偈，同大家渡過一個愉快同精彩嘅周末晚上。」
陳瀅蔡潔搞《Pillow Talk》整裝待發。
