40歲零157日，摩特歷成為歷來喺意甲入波年紀第三大嘅球員。（之前兩位係41歲零25日嘅哥斯達古達同埋41歲零166日嘅伊巴謙莫域）
摩特歷上陣90分鐘，一個入波， 95%嘅傳球成功率，7次重奪控球，賽後當選最佳球員。克羅地亞中場賽後表示球隊唔能夠承受喺今日犯錯，下半場稍為放鬆同未夠專心，因此對手能夠入波，不過最終球隊能夠入到第二球。而第150場喺意甲上陣嘅湯姆尼表示摩特歷加盟之後已經成為球隊嘅榜樣，佢嘅質素同跑動，亦都成為比賽嘅分野。年紀比摩特歷細7歲嘅比薩教練希謝瑪賽後就話，球隊表現比之前更加穩固，速率亦都提升咗，但若果球隊持續失去控球權，咁就要長期防守會相當困難，佢哋要喺呢一方面作出改善。智利國家隊中場 萊奧拿（Felipe Ignacio Loyola Olea）侵犯柏夫洛域輸十二碼，同時殺入對方禁區入波，有得有失，但整體跑動多亦都積極，表現唔錯。
費倫天拿今季第二次聯賽作客贏波。近五場科莫嘅主場聯賽，三場有紅牌，兩場係對手打少個，今場係科莫前鋒摩拉達被逐，呢三場除咗要鬥技術、戰術，更重要考驗大家嘅心戰同情緒控制。而科莫破密集嘅能力有待提高。
費倫天拿踢下風波嘅搶分能力仲高少少，法基奧利取得今季聯賽第一個入波，喺中場嘅競爭表現更勝尼高柏斯；盧卡雲尼亞里打正選睇嚟係有助提高球隊嘅士氣。
意大利盃四強前哨戰，亞特蘭大贏兩粒。拉素今季其中一樣比較成功嘅係防守能力，頭24場聯賽有11場不失球，不過羅馬洛尼停賽，希拿傷出，最好嘅一對中堅拍檔都相繼缺陣，難免有所影響。丹尼爾馬甸尼踢偽9號，比出任左中場更合適，今場有五次埋門係全場最多。
收起唔少主力嘅真藍黑，卡尼錫基有6次撲救，近期狀態大勇。迪基特萊爾受傷，森馬錫（Lazar Samardzic）更加重要，但今場表現平平。
兩個循環嘅意大利國家打吡總數有12個入波，最後都係一個遠射分高低，兩場都好精彩，各贏一場平分秋色。唔計烏龍波，4個入波3球係意大利球員射入。
迪馬高今季有14個聯賽助攻，近5場比賽2個入波7個助攻；施連斯基2026年有第4個聯賽入波，狀態唔錯。
祖雲達斯防守嘅紀律同鬥志係值得稱讚，盧卡迪利瞻前顧後，個人認為今場踢得最好嗰個；麥堅尼今場有兩個助攻。
意甲第25週賽事賽果-比薩1-2 AC米蘭科莫1-2 費倫天拿拉素0-2 亞特蘭大國際米蘭3-2 祖雲達斯烏甸尼斯🆚薩斯索羅（稍後時間進行）帕爾瑪🆚維羅納基蒙尼斯🆚熱拿亞拖連奴🆚博洛尼亞拿坡里🆚羅馬
serie a 🇮🇹
