保維相隔440日重返球場
自從2024年12月代表費倫天拿對國際米蘭時突發心臟停頓，之後因為植入除顫器而無法繼續喺意大利踢職業足球，保維喺2026年1月加盟屈福特，尋日為呢支英冠球隊後備上陣，同普雷斯頓踢成2-2平手 。
呢位23歲球員賽後表示，重返球場嘅感覺太好嘞，但對結果有啲失望，因為佢哋值得贏波。佢必須感謝工作人員同隊友幫助佢適應呢度新嘅足球風格。並且多謝球迷幫佢克服困難，令佢並唔覺得孤單，俾佢重返球場嘅力量，羅馬球迷同全世界所有人嘅呢份力量，令佢有機會踏出呢一步。佢自己嘅主要目標係盡可能多踢比賽，回復以前甚至更高嘅水準，升上英超係佢哋嘅遠大目標。
佢話呢段經歷最開頭嘅時候，佢係避開唔睇足球，避免令自己感到憤怒，之後慢慢開始睇舊隊友、朋友嘅比賽，然後佢嘅好朋友網球員確保利克服困難嘅經歷，令佢自己都相信可以做得到，並為重返球場而努力。
被問到意大利同英格蘭喺比賽、飲食同天氣有咩分別嘅時候，保維表示佢要坦白講兩個地方嘅食物係有分別，但係屈福特嘅老闆係意大利人，所以球會飯堂嘅飲食係唔錯。 而天氣方面對佢嚟講唔係問題，佢女朋友喺倫敦讀咗三年書，所以佢都嚟過英國呢邊好多次。
被問到最鍾意嘅英國食物係乜嘢，保維話肯定係 Porridge（粥） 。
順帶一提，屈福特上個星期一又換咗新領隊，而家領軍嘅係35歲英格蘭人艾活史迪爾（Edward Still）。🟡⚫️
