加拉塔沙雷第一次喺歐聯正賽一場入5球；祖雲達斯第一次喺歐聯正賽一場失5球。
加拉塔沙雷嘅巴西中場加比爾沙拿（Gabriel Sara） 係好值得留意，中遠距離射波、左右腳嘅能力都好，賽後成為今場最佳球員。過去大半年辛尼同諾亞蘭治嘅加盟，令到加拉塔沙雷嘅邊路選擇更多，戰鬥力更強大；達雲遜山齊士個人第一次喺歐聯入波。
祖雲達斯下半場中後段大部份球員都筋疲力盡，連續兩場比賽都有球員被逐，加埋四日踢兩場，相反加拉塔沙雷對上一場聯賽喺上星期五踢，有更多時間恢復同準備。比瑪傷出，甘拜亞素上半場攞黃牌，半場被換走，卡巴（Juan Cabal）入替後21分鐘攞咗兩張黃牌，祖雲達斯嘅防線配搭一再改動。麥堅尼踢偽九號對佢個人嚟講，應該唔係一個最好嘅安排，但對球隊整體嚟講，係可以嘗試，不過今場耶廸斯比較失色，進攻就更加乏力；而高普文拿斯（Teun Koopmeiners）個人第一次喺歐聯入波。
自從上季開始計，基拿斯（Sehrou Guirassy）係歐聯入波加助攻(17 +7)次數最多嘅球員。利亞臣（Julian Ryerson）近期助攻同傳送能力非常好，近三場比賽有六個助攻。上個月為意大利U19 代表隊踢咗一場國際賽嘅右中堅歷基安尼（Luca Reggiani） 第三場喺多蒙特一隊披甲，兼個人第一場歐聯上陣，表現中規中矩。兩隊攻門機會都不多，加埋只有16次。
今晚兩支意大利球隊都比對手少一日休息，兼且要作客，喺呢啲實力接近、最高水平，兼講求細節嘅比賽，分別係明顯嘅，何況意大利球隊速率相對較慢、身體對抗相對不強。
史卡麥卡上半場表現非常低迷，換入卡斯度域之後明顯喺前場競爭，身體對抗方面有所提高。迪基達萊爾缺陣，中前場串連，用波創造嘅工作就落喺沙路斯基身上。艾達臣係踢得最好嘅一位亞特蘭大球員，回防補位同組織用波都最有水準。
歐聯附加賽首回合第一比賽日賽事賽果-加拉塔沙雷5-2 祖雲達斯多蒙特2-0 亞特蘭大賓菲加0-1 皇家馬德里摩納哥2-3 巴黎聖日門
UCL歐聯附加賽
