方力申46歲生日爆喜訊！囡囡中文名定名「方愛嘉」 直言準備追多個B.方力申去年12月榮升新手爸爸，同太太葉萱（Maple）迎來愛女Isla，自此變身「曬女狂魔」，不時在社交網分享囡囡日常。今日（26日）正係方力申46歲生日，佢喺IG晒出父女合照，公開女兒中文名「方愛嘉」，更大爆計劃追第二胎！
方力申去年情人節宣布，同細14年圈外女友葉萱於美國註冊結婚，婚後不足一年就傳出喜訊，升級三口之家，生活美滿。結婚生女連環喜訊，方力申坦言近三個月感受良多：「如果人生係一場遊戲，單身嗰陣我覺得自己都幾好，工作穩定，有過啲成績，自己同父母都健健康康，但結婚後，呢個遊戲突然難咗好幾級！」佢話結婚要實踐「一生一世」承諾，囡囡出世後體會更深：「養兒一百歲長憂九十九，各種計劃、擔心不斷湧現，同太太一齊經歷，未來旅程肯定更刺激，緊張又期待！單身係活好自己，結婚生仔就係將『我』變成『我們』。」
方力申親自解釋囡囡中文名由來：「揀『愛』字，因為我房門有『愛』同『家』兩幅書法，家庭對我最重要，普通話亦同Isla呼應。『嘉』字係陳定幫師傅揀，發音同『家』一樣。」佢更公開家庭密碼：「家庭Family，F代表Fong，A係Alex，M係Maple，I係Isla，L係未來寶寶，Y係Yip，中英文都夾，所以定名愛嘉。」佢亦向愛女送上生日願望：「Isla愛嘉，爸爸希望妳一生平安、健康、快樂！」言語間已透露隨時預備追多個B。
