【On.cc】吳業坤獲23位女Idol圍唔敢望 戒女色高呼：好驚呀！
歌手吳業坤曾跟麥明詩、前Super Girls成員Aka及Heidi、孫慧雪、龔嘉欣及吳若希等18位女星傳緋聞，在宅男界創下輝煌成績，但自從和日籍太太濱口愛子拍拖至結婚，其「溝女本能」盡成失變成異性絕緣體，不過日前他單拖現身音樂製作人James Ting的《心急人電音祭》，完騷後再入後台聽23位「偶像女生一期生」唱歌及開心影大合照，令人勾起曾傳迷戀當時只得15歲的姚焯菲，因而被誤會為「怪叔叔」的他又去識女仔。
在網上流傳的短片中，吳業坤一踏入後台休息室，眼前即出現23位穿上短裙仔的「偶像女生一期生」，年紀最細只有14歲，位位都青春無敵，當身邊有人問他：「你唔係影相咩？」，昔日口甜舌滑又主動的他開始怕醜，雙手揞面及想匿埋，不過一眾美少女大唱他的代表作《陽光點的歌》以示歡迎時，他又尷尬到頭耷耷兼屈膝，但仍不忘高舉勝利手勢，再跳幾吓舞步表謝意，場面超搞笑，之後他向鏡頭表示：「我依家係叔叔，好驚呀。」據知吳業坤和美少女有互動，全因女圑的經理人正是他相識多年的朋友。
吳業坤今次同23位「偶像女生一期生」合照，好驚。
尷尬到唔敢望。
吳業坤接受訪問時被問到遭23位美少女包圍，可擔心太太呷醋？他強調睇騷並非為識女仔：「其實嗰日我趁攝到時間先去捧James Ting場，因為佢曾經幫我監製過《一路》嗰首歌，太太都知我去睇騷嘅，同埋太太亦知個騷有啲日本偶像，所以唔怕太太呷醋，我同女圑嘅經理人識咗好多年，佢介紹新人畀我識啫，純粹打招呼，都好開心我啲舊歌大家仲識。」
跳舞時都好尷尬。
原來佢同女圑經理人係好友，所以先同女團互動。
