【娛聞】63歲黃日華被爆「失業」以積蓄過生活 仍買禮物贈粉絲令人感動
.
曾與梁朝偉、劉德華、苗僑偉、湯鎮業喺80年代組成獲TVB力捧「五虎將」嘅黃日華，一度係TVB男一之選，拍過嘅劇集《射鵰英雄傳》、《香城浪子》、《義不容情》、《馬場大亨》、《天地豪情》等，套套深入民心。但63歲嘅華哥近年已甚少參與演出，主要係參與明星足球隊活動，不時返內地作賽。
有與明星足球隊相熟嘅內地網民，早前拍片分享與黃日華接觸嘅點滴。呢位網民喺影片資訊寫道「黃日華先生雖然說他失業了，但是他也會花以前的，盡他所能，並親自挑選從香港帶到慈溪給這裏的粉絲們」。而片段一開頭，黃日華以港普問守候嘅fans「金色、銀色、紫色、咖啡色，你們喜歡哪一個？」，然後就向粉絲送上禮物。轉個頭，黃日華再問fans有冇拆禮物，有人答「拆了」，華哥得知fans覺得「好看」都不期然講句yeah，仲展示其他fans送俾佢嘅電話套。黃日華隨後再三叮囑fans拆禮物，最後fans同華哥拎住個紫色袋仔合照，相信就係華哥送嘅小禮物。
睇返其他片段，黃日華北上都有唔少人等住同佢合照，而華哥態度相當親切，同fans有講有笑，簡直係零架子。有網民認為黃日華「寵粉」相當難得，亦有人認為話黃日華「失業」唔太合適，華哥比較似係退休。
拍過無數劇集嘅黃日華，近年甚少參演劇集或電影，對上一次已經係2017年客串電影《追龍》。華哥早前喺李珊珊嘅直播節目中，親自解釋點解唔再拍戲，原來係同2020年因血癌逝世嘅太太梁潔華有關。「太太係我頭號fans，每次佢睇完會畀意見，因為佢分析力好強，我先有進步。自從佢走咗，睇唔到我做戲，咁我仲做嚟做咩？」。未有復出之意，黃日華直言本身唔係咁鍾意做呢行，但亦冇咩財政壓力。「唔係咁大戲癮。加上經濟唔算有壓力，冇影響之後生活，就當休息下。」
