【On.cc】譚輝智羅啟豪開紅館騷 網友扯火鬧爆：點解唔批期畀謝安琪
《中年好聲音》帶紅多位歌手，令素人變明星，當中人氣爆紅嘅羅啟豪同譚輝智雖然出道時間唔算長，但係嚟緊六月佢哋將會合體喺紅館開演唱會，二人特別感激鄭丹瑞（旦哥）助圓夢，擔任演唱會創作總監，又請嚟趙增熹為佢哋演唱會擔任音樂總監，向外界發布震撼彈！正因為二人出道時間短，好多網友都驚訝兩人到底有咩歌可以撐場，更質疑紅館批期標準，唔同歌手嘅Fans均為偶像抱不平，指實力唱將如謝安琪、陳健安等，對於早前受多人批評「冇資格唱紅館」嘅陳凱詠不忿，大彈紅館審批大細超：「有心唔批嘅話，今日個場空咗有檔期都可以唔批畀你🙂↔️」、「紅館門檻已經低無可低😪」。
譚輝智同羅啟豪宣布紅館開騷，評論好壞參半。
羅啟豪同譚輝智出道僅3、4年，就已經上紅館。
羅啟豪同譚輝智有鄭丹瑞、趙增熹等猛人幫手搞騷。
有眼利網友又發現，譚輝智佢哋今次票價最貴係$1380，原來比台灣金曲男歌手盧廣仲個唱價更貴，質疑搶錢升呢做「天王價」。不過亦有網友力撐二人開紅館騷冇問題，因為二人皆是實力唱將：「起碼羅啟豪譚輝智冇走音喎」、「佢哋兩個唱得好過好多依家既專業歌手」、「最有實力的一對」。
謝安琪自2023年入紙申請紅館檔期仍未獲批。
網友質疑二人冇資格。
更發現票價驚人，比金曲歌手更貴。
網友大彈紅館審批標準。
