口水多過浪花｜JW王灝兒轉戰獨立歌手靠厚面皮闖關 今年新歌暗藏秘密訊息.JW王灝兒日前在電台節目《口水多過浪花》接受鄭裕玲（Do姐）专访。這亦是她相隔兩年再度登陸該節目——上次到訪是以演員身份分享拍劇點滴，今次就以獨立歌手的身份，毫無保留大談自立門戶後的點滴、入行15年的心路歷程，仲公開了獨家慳錢大法同今年的音樂大計。
Do姐提起JW兩年前上節目時正為劇集宣傳，都好奇向來以歌手身份為人熟知的她，為何會主動闖入演戲領域。JW坦言，自己早前跟彭秀慧老師學演戲，過程中發掘了對演戲的熱愛，奈何當時根本沒有拍劇機會，於是主動爭取機會加入電視台，就為了爭取演戲的可能。提起拍劇的體驗，JW直言相當好玩，更指演戲同唱歌有著天淵之別：「唱歌係你一個人喺台上，活喺自己嘅世界入面，有時可以同觀眾互動玩樂；但演戲係團隊工作，唔係單方面嘅事，你要同對手互相交流先得。」她亦坦言完全不後悔嘗試拍劇，未來如果有機會，仲想挑戰同自己性格反差大、「唔係咁正常」的角色，覺得先夠有挑戰性。
講到人生最大的新挑戰，莫過於2010年出道、入行足足15年的JW，在去年7月約滿後正式告別合作過的三間唱片公司，自立門戶開設個人工作室，轉做獨立歌手，全盤掌控自己的音樂事業。JW坦言，過去十幾年喺不同公司，就好似海綿一樣不停吸收經驗，去到今時今日呢個年紀，就覺得是時候試下自己全權負責，親手打造自己想做的音樂。她更透露，當初約滿的時候，其實都有同好幾間唔同的公司傾過合作，亦都明白簽公司有穩定性，背後有團隊幫手，會舒服好多，但最終推動她決定自立門戶的，是想全權掌控自己的音樂方向：「過去15年同好多唔同的人合作過，有時好多決定要經過好多唔同人的意見，去到今時今日，我好想試下，就咁自己全權話事，做自己真正想做的音樂。」
不過JW都笑言，雖然事前大概知道做獨立歌手要「一腳踢」，但真正落手落腳先發現，要兼顧的事遠比想像中多：以前只需要專心唱歌、揀適合自己的歌，而家連新歌宣傳、約見團隊、同音樂監製談價錢，全部都要親力親為。她更直言，自己的工作室其實只得自己一個人，並沒有請長期員工，就連助理都只會在拍MV等有大量工作要處理的時候，先會請日結助理幫手，所有事務幾乎都係親力親為。
而轉型後最大的難關，JW直言並非寫歌、錄音等音樂創作工作——反而呢啲係她最享受、最覺得興奮的事，真正最難拿捏的，是主動找人幫忙、對方遲遲不回覆時的心理關口。「有時你想接觸人幫手做推廣，佢哋唔覆，你就會不停諗：我塊面皮應該要厚到咩地步？問幾多次先應該停？問兩次唔覆再問第三次，會唔會太唐突？仲要隔幾耐先問第二次？」JW笑言，幸好近期啱啱過完新年，就借住拜年嘅名義再問候對方，順便跟進事項，亦都從中領悟到一個核心道理：唔覆唔代表冇希望。
她解釋，有時對方唔覆訊息，未必係拒絕，可能只係錯過了，或者本身做事習慣就係會先擺低，適當push一下反而有機會。JW更藉住自己的經歷鼓勵聽眾：「有時你想找人幫手，佢唔覆你，再試多一次，真係再試多一次，機會就可能來了，未必就係一個NO。」而呢段經歷亦都令JW練就了更厚的面皮，同埋問人的技巧。她坦言，以前根本唔需要自己傾價錢、傾合作，而家親自去接觸不同的人，對方反而更能感受到自己想做好件事的誠意，就連傾價錢想問可唔可以便宜一點，對方都願意讓步，呢個係以前係大公司入面從未試過的體驗。
做獨立歌手全盤自負盈虧，JW亦都練就了一套實用的慳錢大法，所有開支都親自把關、分毫必計。她舉例，錄音室租金係一筆大開支，就會同監製商量，去對方家裡的studio錄音，效果一樣但成本平一大截；拍MV的時候，見到報價單裡服裝要12000元，就決定自己去借衣服，直接慳低呢筆費用；就連去台灣錄音、去成都拍MV，搭什麼飛機、住什麼酒店，全部都要親自格價、精打細算。不過JW就話，完全唔會覺得辛苦或者後悔，因為自己一早有儲蓄準備，只要做出來的歌好聽，所有付出都值得。
提到今年的音樂部署，JW就大派定心丸，指自己由上年開始已經儲備了大量新歌，絕對會陸續有新作品同大家見面。她透露，自己專程找來丹麥的製作人合作，打造一連串Groovy風格的作品，更專程請對方飛來香港，一齊喺錄音室度度橋、逐首歌打磨創作，而非直接用現成的demo；另外又認識了台灣知名的黃婷老師（曾為梁靜茹、A-Lin、F4等歌手寫歌），因為自己鍾情灑狗血的苦情歌，就同對方邀歌，專程飛去台灣錄音，儲落了一批慘情情歌；仲同香港音樂人蘇道哲一齊寫了屬於自己的原創作品。JW更賣關子指，今年推出的每一首新歌，入面都會暗藏秘密訊息（secret message），會隨住作品陸續推出，慢慢同大家揭曉。
而她的終極目標，是希望今年可以不停出歌，等大家記得自己歌手的身份，聽多啲自己的聲音，最終可以推出一張完整大碟，仲要舉辦屬於自己的世界巡迴演唱會。她坦言，以往只係喺英國、澳門同內地部分城市做過演出，從未試過真正的世界巡迴，呢個亦都係自己一直以來的心願：「不時都有世界各地的粉絲留言，叫我去佢哋嘅地方唱歌，我都希望自己的歌聲可以去到更多唔同的地方，見到一班支持自己的粉絲。就算場地幾細都好，只要有機會現場唱俾大家聽，將自己的能量傳遞出去，我就好滿足。」
訪問途中，講起自己對音樂的執著，JW亦都忍不住感性落淚。她坦言，好掛住做歌手的自己，亦都好希望大家可以感受到自己的努力，唔好因為其他新聞同話題，忘記了自己其實一路都冇停過腳步。JW憶述，自己由中學開始就鍾意唱歌，不停參加各類唱歌比賽，就為了可以不停唱歌，亦都正因為不停參賽，先被黎明（Leon）發掘，正式入行。就連喺英國讀書的時候，同學們都去歐洲旅行，佢就永遠飛回香港工作，從來冇停低過；就算中間遇上疫情，都冇停下來，專心去學演戲，更為了演戲機會主動爭取入電視台，直到試完自己想試的事，就決定重返音樂路，開啟獨立歌手的新旅程。
Do姐都大讚，歷年來訪問過JW無數次，以前只係一個小妹妹，而家經歷過種種，決心做獨立歌手面對咁多挑戰，整個人變得強大又有power。JW就笑言，做人一定要夠powerful，自己人生經歷過好幾個低潮，就好似坐過山車一樣，但正正因為經歷過低潮，先會明白，當你跌到最低點，就只會往上走，人亦都變得更樂觀。她坦言，自己係絕對大情大性的人，睇廣告都會喊，遇到低潮都會俾自己時間沉浸係唔開心入面：「唔開心嘅感覺都係一個經歷，我要記住呢個感覺，無論係被人拒絕、求人唔理，所有經歷都可以放進我嘅歌入面。等自己沉澱一陣，過咗就會再開心起身，永遠記住，When you are down, you can only go up。」TVB
