《女孩不平凡》首映｜廖子妤余香凝相隔十年再合作 公開爭取無上限激情戲.由廖子妤（Fish）、余香凝（Jennifer）、陳穎欣（Yanny）、許恩怡、鄧濤等主演的新片《女孩不平凡》日前舉行首映，一眾主演齊齊現身撐場，除了大談拍攝點滴，更爆盡幕後趣事、獎項心態同未來計劃，全場話題十足。
今次係Fish同Jennifer繼十年前《骨妹》後再度合作，二人都直言相隔多年再拍檔，默契非但冇減，反而更上一層樓——完全唔需要事前對戲、溝通走位，一叫action就可以自然入戲，你拋我接，喺角色入面互相遊走，合拍度十足。不過二人就笑言，今次劇中嘅親密戲走「細水長流」路線，偏向老少咸宜，完全未夠喉。Fish更大膽公開向導演爭取，下次合作要拍尺度「冇上限」嘅同性激情戲，仲提議要拉埋Yanny加入，大玩「三人行」，大膽發言令全場哄動。
Jennifer就笑爆，老公睇到佢同Fish嘅親嘴戲時，反應比睇佢同男演員嘅親密場面大得多，當場捏緊佢隻手，明顯有少少激動，不介意再挑戰下老公嘅底線。二人都坦言，希望唔使再等十年先有下次合作，最好兩年內就可以開工，仲笑言睇返十年前後嘅照片，二人狀態都冇太大改變，與其等多一個十年先見真章，不如趁早圓了呢個心願。Fish仲感慨，當年拍《骨妹》時自己仲係演少年版角色，今次再拍同類題材，自己已經有專屬的少年版演員，深深感受到時間飛逝。Jennifer亦補充，今次自己飾演的角色，係Fish身邊默默陪伴、鼓勵佢相信自己的「小太陽」，看似平淡的互動入面，其實充滿住內心的激情，同樣好有睇頭。
剛剛喺澳洲舉行完婚禮、榮升陳太嘅Yanny，今次喺戲入面飾演許恩怡年輕時嘅表姐，仲首度公開分享婚禮上嘅驚險趣事。Yanny甜笑話，自己同老公剛剛新婚，仲係處於感情好濃烈的階段，而婚禮最難忘的，莫過於婚前一日的突發狀況——當日佢先發現自己拎錯咗人哋嘅行李，裝住婚紗的行李箱不知所蹤，嚇到一班好友手忙腳亂，逐個密碼試先打開錯拎的行李箱，先發現入面嘅物品完全唔屬於自己，簡直係電影橋段真實上演。幸好最後有朋友即刻趕去機場幫佢拎返正確行李，先至冇搞到大婚當日冇婚紗著。Yanny就笑言，就算有突發狀況，都係婚禮難忘回憶嘅一部分，仲話一班好友齊齊去外國見證婚禮，喺異地一齊玩得超瘋，彼此關係變得更親密，亦都將婚禮標準set得超高，搞到接住咗花球的Fish壓力大增。
一班好友當日就趁機向Fish催婚，問佢幾時同男友小野拉埋天窗，仲話如果今次順利拎到影后，會唔會順勢喜上加喜、造就「雙囍臨門」。Fish就當住金像影后余香凝面前，大談坊間流傳嘅「得獎魔咒」，笑指聽聞拎完獎會三年冇戲拍，要睇下自己會唔會「大熱倒灶」先，又直言而家以電影大計為先，結婚嘅事隨緣就好，仲放話如果真係得獎，會請成間公司一齊去旅行慶祝，唯一要求就係唔使自己煩計劃。佢仲笑言，親戚朋友從來冇催過婚，反而被呢班好友催到感受到過年被親戚追問嘅壓力。
今次電影亦都強勢入圍第44屆香港電影金像獎多個獎項，包括最佳女配角、最佳新演員，仲有陳蕾主唱的主題曲《普通人》入圍最佳原創電影歌曲，一眾主演都直言，入圍已經係好大嘅肯定，亦都希望可以藉此令更多觀眾認識呢部作品。
同樣入圍影后角逐嘅許恩怡就透露，公佈提名當日自己仲係度食緊嘢，收到監製嘅恭喜訊息先知道消息，當時完全唔敢相信，就連媽咪柏安妮都大嗌「Oh my god」，話難以置信，仲直言好為佢驕傲。許恩怡仲分享，今次拍攝最難忘嘅有兩幕：一幕係畢業派對唱K的戲份，因為當年自己因為工作錯過了高中畢業派對，今次拍攝就好似幫自己補返呢個遺憾；另一幕就係同對手初相識的戲，喺好漂亮的校園入面拍攝，就算唔劇透太多，都依然記得拍攝當時心動的感覺，印象相當深刻。
而同時入圍兩個獎項、被笑「叫兩飛」嘅鄧濤，就坦言自己對「最佳新演員」獎項比較有信心。佢話，今次能夠同Natalie（許恩怡）、Fish一齊入圍，仲剛好同電影主題曲《普通人》一齊入圍金像獎，覺得有種特別的緣分，亦都係對整個團隊的肯定；又話今次入圍對手都係自己好欣賞嘅演員，今年競爭相當激烈，能夠入圍已經係好大榮幸。佢仲分享，今次拍攝親密戲有專業親密指導在場，事前會好似排動作戲一樣，將所有走位、細節都排練妥當，亦都同對手演員提前培養默契，仲專程一齊去露營增進熟悉度，所以拍攝過程相當安心，完全冇壓力。
導演就分享，自《骨妹》之後一直同Fish保持聯絡，時不時都會傾計想一齊再合作，今次《女孩不平凡》的劇本一出，就覺得入面滿滿的女性力量，一定要搵一班熟悉的女演員一齊演繹。今次電影橫跨香港、澳門、台灣三地取景，講述三對唔同階段女性嘅愛情故事，核心想傳達：女性唔需要被社會嘅既定標籤綁住，無論想過平凡定不平凡的人生，只要搵到自己自在、舒服的位置，就已經足夠。佢仲笑言，收到好多粉絲寫嘅fanfiction，絕大部分都係想睇Fish同唔同女演員的搭配，會認真考慮大家嘅提議。
