方力申為紅館個唱海報撞款尹光全權認責 梁芷珮下周啟程赴南美拍《潮什麼》.方力申同梁芷珮（Christy）現身大型運動活動，聯同一眾參加者挑戰「最多人線上線下同時做開合跳」的健力士世界紀錄，現場氣氛熱鬧非常。近期宣布入紙紅館成功、即將舉行紅館個唱的方力申，成為全場焦點之一。不過早前佢公開的個唱海報，就被網民發現同尹光2023年的紅館個唱海報設計撞款，引來網上熱議。對此小方當場直言，呢件事自己要全權負責：「因為我本身由細到大都好鍾意粉紅色，十幾歲代表香港出賽游泳比賽時，泳隊的泳帽、裝備都係粉紅色，一直都覺得粉紅色配粉藍色好出眾，所以今次海報的配色同設計，都係我親自拍板決定的，估唔到出嚟會同光哥的海報幾乎一模一樣。」
小方仲透露，事件發生後第一時間就聯絡咗尹光，兩人本身係熟絡的乒乓波波友，經常約埋打球，光哥非但冇介意，仲即刻恭喜佢圓紅館夢，仲話如果有咩需要幫忙，一定會全力支持，令小方相當感動。入行至今25年，終於迎來屬於自己的紅館個唱，小方承諾會拼盡全力，為歌迷準備最完美的演出。不過佢就笑言，而家有個甜蜜的煩惱：「準備個唱最大的困難，就係我的囡囡。每次返到屋企見到佢，就咩都唔想做，淨係想望住佢、攬住佢，而家最要克服的，就係平衡排練同陪囡囡的時間，要好好拿捏兩邊的節奏。」被問到會唔會覺得囡囡「腳頭好」，一出世就旺到爸爸成功申請到紅館檔期，小方即刻賣口乖，將所有功勞歸於老婆：「絕對要多謝我太太，全靠佢好識生！呢個就係『千金』的意思，囡囡將福氣帶到俾身邊所有人，而家呢一刻，係我人生最幸福的時間。」
而同場的梁芷珮，就為即將啟程的旅遊節目做足準備。佢主持的《潮什麼》系列旅遊節目一向大受觀眾歡迎，今次佢就預告，下星期就會正式啟程飛往南美，拍攝新一輯《潮什麼》。Christy透露，今次旅程相當有挑戰性，唔單止會深入亞馬遜雨林，仲會去到智利走訪冰川，一個旅程入面就會經歷齊四季氣候，仲有大量上山下海的體力勞動環節，非常考驗體能，所以呢排都積極做運動訓練，就連執行李都要花好多心思，要準備齊曬唔同季節、應付唔同場景的裝備，相當考驗功夫。TVB
