馮德倫相隔27年重返樂壇出新歌 舒淇大讚易上口 直認夫妻合唱絕無可能.馮德倫原創動漫IP BUCKET MAN推出至今已一周年，繼去年聯同劉建文（Michael Lau）合作打造BUCKET MAN Figure後，今年再有新搞作——不但與three zero合作推出「Bucket man zero」Figure，更為推廣IP相隔27年重返樂壇，推出全新單曲《屢戰屢敗又怎樣》。
談到今次再以歌手身份出歌，馮德倫直言完全冇壓力：「今次我係認真去做，但成敗唔係重點，我唔係靠呢首歌搵食，係有原因先去做，就係為咗呢個IP。」他透露，雖然新歌錄音同MV拍攝過程相當快，但前期構思足足花咗一年時間。當初佢一直覺得BUCKET MAN呢個IP需要配搭合適的歌曲，只不過唔想動漫同自己個人綁得太緊，先遲遲冇決定親自演唱，今次趁住同three zero合作推出Figure，先覺得「出師有名」，順理成章推出新歌。
佢形容呢首歌熱血又勵志，好適合呢個年代，仲特意加入搖滾旋律，只不過歌曲音域偏高，對佢嚟講有一定難度。錄音期間，佢仲特意找監製Eugene臨急抱佛腳，上咗幾堂速成唱歌課先完成錄製，更笑言「錄音嗰陣唔敢想太多，驚想太多就唔敢做了」。佢提到，呢首歌的demo本來就係three zero團隊創作，自己聽到之後覺得質素極高，唔想浪費，先決定拿來親自演繹，更抱定「一係唔做，一做就要認真做好」的心態，不僅拍攝正式MV，更找來專業團隊做發行，絕不馬虎。至於出歌後會唔會開音樂會，馮德倫就話暫時未有計劃，要同唱片公司商討再決定，不過就預告呢幾日會有同新歌、IP相關的連串宣傳驚喜陸續推出。
講到昔日同雷頌德（Mark）組成的經典樂隊Dry，馮德倫就透露重組合作有新進展。佢話之前同Mark做IG專訪重溫舊作時，Mark主動提議不如再為Dry寫歌、搞新動作，事後佢再問詳情，Mark亦答應合作。佢笑言：「如果今次呢首新歌反應好，Dry嘅計劃就會更加順利，一去到Dry嘅創作，當然係由佢作主，監製、寫歌全權交俾佢。」據悉，馮德倫上一次推出個人音樂作品，係1999年於台灣發行的國語專輯，今次亦是佢相隔27年再推出個人單曲。
提到太太舒淇對新歌的評價，馮德倫就笑言：「你覺得佢對住我一定會讚？咁你真係唔太認識佢，佢係好實事求事嘅人，覺得好就好，唔好就絕對唔會客氣。」佢透露舒淇已經聽過新歌，大讚歌曲好聽、易上口，只不過自己當初係決定做呢件事之後，先同對方講，並非特意諮詢意見，仲笑言新歌仲未俾阿媽聽，遲啲會搵機會俾老人家聽下。
被問到會唔會同舒淇以夫妻檔合唱，馮德倫二話不說直認「呢件事絕對冇可能發生」，直言自己本身就唔鍾意呢種形式。至於要咩條件先肯夫妻檔合作，佢就坦言，兩人都係創作上有主見、習慣做最終決定的人，如果一齊做創作決策，難免會有意見不合引起衝突，大家都唔想因為工作吵架，呢個亦係兩人的相處之道。不過佢就鬆口，如果係分工明確的合作就可以接受：「如果有工作係佢做導演我去演，或者我做導演佢去演，咁就冇問題，就連拍廣告都得，只不過佢搵唔搵我演就真係唔知啦。」
講到舒淇的近況，馮德倫就透露，對方有幾部已經拍好的作品仲未推出，而導演方面的工作，舒淇仍在努力撰寫劇本，需要多啲時間打磨。早前舒淇身處米蘭，被問到有無因為中東戰火延誤返港，佢就表示舒淇完全冇受影響，已經安全返港。而對於早前舒淇接受鄭裕玲訪問時，提到曾停工一年備孕的話題，馮德倫一聽就即時避談，表示「唔講呢啲了」。
向來鍾情跨界嘗試新事物的馮德倫，從唱歌、做導演、拍劇到搞動漫IP都有涉獵，佢就笑言：「我成日覺得，做人要麼就做最聰明嗰個，要麼就做最搶先去做嘅人。我絕對唔係最聰明嗰個，唯有永遠走前一步去試新嘢，當然唱歌唔算新嘢，但好似搞動漫IP、以前搞處境喜劇、做導演呢啲，都係想行先一步，有時就算太早，都好過太遲。」
