衛詩雅「違約」公布金像提名 陳家樂帶兩歲女兒行紅地氈？
衛詩雅與陳家樂近日齊集尖沙咀出席開幕活動，兩人自從陳家樂結婚後便鮮少同框工作，相隔兩年再度合體，互動搞笑又默契十足。衛詩雅率先「投訴」：「自從他有連詩雅（Shiga），就唔使我呢個衛詩雅啦！哈哈！佢同 Shiga 的確幾襯，不過我同我老公周祉安先至最合得來～」陳家樂則笑謙：「衛詩雅係影后級人馬，我高攀不起呀！」
談到今屆金像獎記者會的小插曲，衛詩雅當時負責公布「最佳男主角」入圍名單，事前早已同陳家樂約定，若有他的名字要第一時間讀出。陳家樂透露：「我當日係屋企睇直播，見到佢偷睇名單嘅表情，心諗『到底有冇我份呢？』點知佢第一個讀張繼聰，我即時覺得『今年又冇望啦』，仲開始調整呼吸添！」結果衛詩雅隨後读出他的名字，讓他又驚又喜，大讚對方演技精湛：「佢個反應簡直影后級，層次好豐富！」衛詩雅則解釋當時太緊張，其實一直「盲撐」陳家樂：「我同佢早約好，就算名單冇佢，我都照講佢入圍，最多之後道歉話講錯咋！」兩人自入行首部電視劇便合作，一路互相見證成長，衛詩雅直言最希望與他一起有好成績。
今屆衛詩雅亦憑作品入圍「最佳女配角」，被問到記者會上反應平淡，她笑言：「唔係冇反應，係之前見到動作指導、攝影等一班朋友都入圍，已經興奮到忍緊喊，宣佈自己個時魂仲未返嚟！」她坦言對得獎有信心，但更視頒獎禮為朋友聚會，更構思紅地氈四人同行：「我問過老公周祉安，想約埋佢同陳家樂、連詩雅一齊行紅地氈影合照，不過老公話『諗吓先』，要睇當日工作安排。」身為醫美的周醫生，向來低調，衛詩雅笑指兩對夫婦從未一起出席公開活動，相當期待今次合體。陳家樂則透露太太未必趕得切返港陪他出席，早已構思另一個紅地氈陣容：「如果太太唔得，我就帶兩歲女兒 Camila 行紅地氈，仲要帶埋工人姐姐幫手湊！」衛詩雅立刻補刀：「Camila 超聰明，英文仲好過陳家樂！上次我同老公去探佢，Shiga 拿動物圖片問佢，好多難字佢都識講，模仿能力又強，會自己拎電話扮聽電話喊『爸爸』，仲識得幫手收拾鞋、扔垃圾添！」陳家樂亦自豪女兒乖巧，笑言她鐘意參與大人的事，不過擔心紅地氈上會四處走，要工人姐姐隨時「睇實」。
問到衛詩雅可有計劃生小朋友，她坦言：「生小朋友責任太大，我而家有四個契仔契女，同老公加起來仲助養咗近十個兒童，暫時未諗住自己生，有消息一定第一時間公佈！」她亦透露接下來工作滿檔，6 月將拍新戲，年底更會挑戰舞台劇；陳家樂則表示正了解舞台劇項目，希望將來能與衛詩雅以新形式合作，更期待兩對夫婦能有更多機會一起出席活動，齊齊開心見面。
